A plataforma veciñal, Somos Cambados, ven de presentar unha iniciativa para fomentar a participación dos veciños de Cambados na elaboración do seu programa de goberno, baixo o lema “Ti es Cambados. Tod@s Somos Cambados”.
O candidato á alcaldía por Somos Cambados, Tino Cordal, sinalou que a formación leva meses traballando no seu programa de goberno e agora desexan abrilo á cidadanía, para configurar un proxecto «para as veciñas e os veciños de Cambados».
Somos Cambados quere seguir traballando «pola igualdade e a recuperación de dereitos sociais», remarcou. Cordal indicou que o programa de goberno é un documento «moi importante no que levamos meses traballando» para atender tódalas parroquias de Cambados, porque é o seu «compromiso coa cidadanía».
Por iso, desexan que cidadáns e colectivos poidan realizar as súas achegas. Desde este mércores 1 de maio, poderanse suscitar medidas e suxestións na páxina web ‘somoscambados.org’. Os distintos órganos do partido avaliarán as propostas que se reciban e si complementan ou engaden novos enfoques ao programa de goberno incluiranse.
O candidato á alcaldía por Somos Cambados, Tino Cordal, valora moi positivamente este tipo de iniciativas de recollida de ideas e propostas dos veciños para incorporar ao programa de goberno co que esta plataforma veciñal concorrerá ás eleccións municipais do vindeiro 26 de maio. Esta iniciativa responde a un dos obxectivos de Somos Cambados desde a súa fundación, que non é outro que establecer unha interlocución directa coa cidadanía cambadesa. Así, Somos Cambados elixiu o pasado mes de novembro ao seu candidato á alcaldía a través dun procedemento público e aberto a todos os veciños, no que calquera cambadés puido presentarse como candidato á alcaldía, sendo a unica formación política que fixo este proceso aberto e participativo a toda a sociedade.
A candidata número 3 de Somos Cambados, Carolina Laya, anima a todos aqueles veciños que queiran aportar a súa proposta que o fagan entrando na web “somoscambados.org”. Carolina Laya, coordinadora desta iniciativa, manifestou que “moitas destas propostas recibidas serán incorporadas ao programa de goberno”.
Esta iniciativa de recollida de achegas únese ás reunións con colectivos e asociacións que Tino Cordal e o resto e candidatos levan realizando nas últimas semanas para elaborar un programa de goberno de Somos Cambados realista e ambicioso.
Por outra banda, Cordal anunciou que nos próximos días distribuirase por todos os domicilios cambadeses un díptico informativo feito polos concelleiros de Somos Cambados neste mandato nas áreas de servizos sociais, sanidade, terceira idade, facenda, comercio e promoción económica.