CORDAL AMOSA A SÚA SATISFACCIÓN POLA INCLUSIÓN DE CAMBADOS NA HOSPITALIZACIÓN DOMICILIARIA

O concelleiro de Sanidade, Servizos Sociais e Terceira Idade, Tino Cordal, amosou hoxe a súa satisfacción pola inclusión de Cambados no servizo de hospitalización domiciliaria (HADO) do Hospital do Salnés, que permite aos pacientes recibir na súa propia vivenda a atención que precisan logo dunha operación ou por causa dunha enfermidade

Este servizo non incluía a toda a área sanitaria da nosa comarca. Comezou fai case once anos prestándose só en Vilagarcía de Arousa, estendéndose posteriormente tamén ás veciñas e aos veciños de Vilanova de Arousa e Catoira, e aos centros xeriátricos existentes en Ribadumia e Vilanova. Pero seguía sen atender á veciñanza de Cambados, A Illa de Arousa e Ribadumia.

Esta situación era coñecida polos profesionais sanitarios e polos representantes sindicais do Hospital do Salnés, quen, en varias ocasións, se dirixiran ao Servizo Galego de Saúde (Sergas) solicitando a ampliación da HADO a todos os concellos da área sanitaria da nosa comarca.

O concelleiro de Sanidade, Servizos Sociais e Terceira Idade, Tino Cordal, levou o asunto ao pleno da corporación municipal cambadesa en marzo do ano pasado, trasladoulle a súa reivindicación á Xunta de Galicia e agora, por fin, ve recoñecida a súa demanda por parte da Consellería de Sanidade, pois a HADO atenderá tamén aos habitantes de Cambados, A Illa e Ribadumia, logo do anuncio feito público onte polo Sergas.

Non estamos a ter a mesma sorte coas outras reivindicacións feitas por este concelleiro ante a Consellería de Sanidade, tales como: a prestación de máis especialidades médicas no Hospital do Salnés, o reforzo de persoal tanto no Hospital como no Centro de Saúde de Cambados (médicos, enfermeiros, celadores), a apertura definitiva do terceiro andar do centro hospitalario, a mellora do servizo de cociña do mesmo, a ampliación e a gratuidade do aparcadoiro, a necesaria reforma do Centro de Saúde de Cambados e a asunción do seu mantemento por parte do Sergas, etc.

Por outra banda, Cordal leva máis dun ano agardando para ser recibido polo Conselleiro de Sanidade e o seu Secretario Xeral para tratar todos estes asuntos relativos ao Centro de Saúde de Cambados e ao Hospital, sen obter polo de agora resposta logo de terlles solicitado cita en dúas ocasións a ambos.