SOMOS CAMBADOS ASISTE Á XUNTANZA DE PLATAFORMAS E MAREAS CIDADÁS GALEGAS QUE SE CELEBRA NO DÍA DE HOXE XOVES 13 DE AGOSTO EN SANTIAGO DE COMPOSTELA

A reunión celébrase hoxe ás 17:00 h na Sala Circular do Auditorio de Galicia e nela participan máis de 30 candidaturas de todo o país. O obxectivo da xuntanza é iniciar o camiño para conformar unha candidatura unitaria e soberana galega da que ninguén se poida sentir excluído, que serva de expresión política da maioría social agredida e do dereito democrático a decidir para asegurar unha ampla presenza dun grupo galego nas Cortes españolas.

As nosa agrupación, Somos Cambados, aínda tendo un carácter e vocación abertamente veciñal e municipal non pode, nin quere, ficar calada ante un proceso de tanta transcendencia como son as próximas eleccións xerais. Somos conscientes tanto do seu carácter extraordinario como da enorme influencia que o resultado das mesmas vai ter na nosa veciñanza e en toda a cidadanía galega. E por iso que nos atrevemos a facer un chamamento a toda a cidadanía galega e tamén ás demais candidaturas veciñais, aos movementos sociais, ás organizacións sindicais, aos partidos políticos e, en xeral, a quen se sinta apelado para construír unha candidatura unitaria galega.

Tendo en conta que a circunscrición electoral é a provincia, esta candidatura galega, cun programa común, deberá  configurarse nas catro circunscricións con listas elixidas directamente, sen intermediarios, nin exclusións, nin delegacións, nunhas primarias abertas nas que poidan participar todas aquelas persoas que así o decidan.